Limba Sarda

Sa lìtera de su generale de sa Brigata Tataresa faghet inchietare a su sìndigu indipendentista

  ITA      SRD

Brigata-Sassari-maurizio-Onnis

BIDDANOA ‘E FORRU. At retzidu una lìtera dae su generale de sa Brigata Tataresa. E no l’at agradèssida. Pro nudda. Maurizio Onnis est su sìndigu de Biddanoa ‘e Forru, est indipendentista e intre de sos promotores de sa Corona de Logu, s’assòtziu chi crobat sos amministratores sardos chi traballant pro arribare a sa truncada – amministrativa e polìtica – de s’ìsula dae s’Itàlia. De aici s’est neghidadu cando est arribada una lìtera cun sa cale su cumandante de sa Brigata li pediat de li dare sos datos anagràficos de sos rèduces tataresos de sa segunda gherra mundiale pro “acostiare e avalorare sas fainas de cussos chi ant contribuidu a fàghere Gloriosa custa Grandu Unidade”. Custa est una parte de s’iscritu, cun tantu de majuscolas. E finas cussas ant indinnadu a Concas. Chi a chèrfidu pònnere pùblica sa pòsitzione sua. Custu est su chi at iscritu:

Ieri ho ricevuto dal generale comandante della Brigata Sassari una lettera. Tengo a parlarne perché testimonia la...

Pubblicato da Maurizio Onnis su Giovedì 5 marzo 2020

Arisero apo retzidu dae su generale cumandante de sa Brigata tataresa una lìtera. Nde chèrgio faeddare ca testimòniat sa manipolatzione pibincosa e sena frenu fata dae s’Istadu subra sas cuscièntzias nostras, chirchende de creare unu mitu chi fatzat sos sardos semper prus “sardos ma finas italianos”. Una trassa chi non sessat mancu in dies ue s’est castiende a àteru. Sa lìtera narat:
«Senn. Sìndigu, a tales de acostiare e avalorare sas fainas de cussos chi ant contribuidu a fàghere Gloriosa custa Grandu Unidade, cheria torrare a pesare su tratamentu, si est galu est biu, cun chie at gherradu in intro de sa Brigata Tataresa in sa Segunda Gherra Mundiale. Pro su chi apo naradu subra, pedo sa collaboratzione sua nodida de m’inditare sos datos anagràficos e de recàpitu de sos rèduces e concitadinos suos valorosos. S’incapas bi siant, sos datos, si podent imbiare a [sighint nùmene e indiritzos] ».Sa lìtera, ondrada cun istemmas e isteddeddu, serrat cun unu bragosu “Fortza Paris!”. E no isco ite m’infadat de prus. Si totu cussas majuscolas:”Gloriosa”, “Grandu”, “Unidade”. O sa punna cuada de fàghere colare sa gherra fascista comente una calesisiat gherra, tantis chi si depant “avalorare sas fainas” de chie at gherradu. O sa rechesta foras de logu de li frunire sos datos personales de sos de sa bidda mea. O sa chirca isfatzida de sa cumplicidade istitutzionale, dende a iscontadu chi, in unu tema gosi dìlicu, la pensemus totus a sa matessi manera.Apo archiviadu sa lìtera: at a abarrare pro mie unu esempru de balia de cussu chi depimus istransire. E prego chi semper prus sardos tèngiant s’atinu de sa diferèntzia issoro cunforma a s’iscimpradòrgiu simil-identitàriu chi nos at istichidu Roma. 

 

contributo regione sardegna sito.jpg