CASTEDDU. Sa commissione Sanidade in Consìgiu Regionale, a pustis de sa relata de Stefano Schirru de su Psd’Az, at torradu su primu eja a su testu de lege subra sos disturbos de s’ispetru autìsticu. Est su P.L.43, primu firmatàriu s’esponente sardista chi at ammentadu comente in Sardigna siat “corfida meda dae custu fenòmenu” sinnalende  finas chi “ in custu campu unos cantos dutores sardos si sunt distintos in intro de sa comunidade iscientìfica internatzionale pro sos istùdios issoro. Bi sunt livellos diferentes de criticidades de sa maladia, ue b’at finas sa sìndrome de Asperger e su disturbu generalizadu de s’isvilùpu”

Su testu previdit sa redatzione de lìnias ghia pro interventos e servìtzios a sos parentes e definit in prus sa rete integrada de sos servìtzios pro sas persones chi tenent disturbos de s’ispetru autìsticu. “Su coro de sa lege est in s’organizatzione de una rete de coordinamentu de sos interventos de sos interventos sanitòrios chi si faghent in Sardigna in campu autìsticu, pro uniformare sas proceduras e megiorare sa calidade in totu sena chi bi siant disparidades intre patzientes ricos e patzientes chi no lu sunt”, at naradu Stefanos Schirru.

In sas chidas chi intrant sa commissione Sanidade, preseètzida dae Domenico Gallus at a leare in esòmene finas su testu de un’àtera proposta de lege subra s’autismu, sa 43, primu firmatàriu Diego Loi (Progressisti).

Presentada finas sa proposta de lege 181 cun firma de Schirru (Psd’Az) intitulada “mesuras urgentes de sustennu a sas istruturas sanitàrias privadas acreditadas pro s’ispecialìstica ambulatoriale, centru de riabilitatzione assistèntzi ospedaliera acreditada”. Sas normas previdint unu mecanismu de antetzipatzione de sas summas in favore de sos sugetos indicados, chi in s’interis de su blocu de su Covid ant traballadu prus pagu. Non sunt prevididas essidas in prus pro su bilantzu rgionale: “No amus a tocare un’èuro, sunt fundos giai istantziados”, at serradu Schirru.