CASTEDDU. S’Universidade de Casteddu s’ammàniat contra de su coronavirus: dae mèrcuris 18 de martzu est asseguradu s’intregu didàticu cun mezos telemàticos, est a nàrrere cun àulas virtuales in una piataforma ebbia. Sa nova bona arribat cun unu vìdeo messàgiu chi Maria Del Zompo, Retore de s’Ateneu at fatu a sas e sos istudiantes.

S’ativatzione de sos cursos online s’at a fàghere fatu-fatu.

In custas dies sas disciplinas insinnadas ant a èssere a disponimentu pro medas matèrias de s’Ateneu ue si potzat agatare càbidos simigiantes intre matèrias.

Moende dae mèrcuris 18 de martzu at a comintzare sa de tres fases cun s’intregu de sos insinnamentos pro cadaunu de sos cursos de istùdiu postos in calendàriu in su segundu semestre.

“S’Ateneu –narat su Retore Maria Del Zompo – at chèrfidu afortiare sas fainas pro assegurare a sos istudiantes suos de pòdere sighire in sas atividades didàticas e pro s’acumprida formativa”.

Cada istudiante est retzende una mail cun credentziales pro intrare in su sistema e sas istrutziones pro l’impitare.

Pro sos esàmenes de profitu. S’Ateneu est in pessu, cuncordendesi cun sos àteros ateneos italianos, de bìere sas maneras telemàticas chi non lassent dudas subra su valore legale de sos èsitos leados.

S’incapas si mantenent sas datas postas pro sas sessiones de làurea de abrile, s’at a trantzire, a manera cumpatìbile cun sos tempos tècnicos acapiados a sa congruida amministrativa de sa carriera de s’istudiante a tales de l’ammitere a sa prova de acabbu. De su restu, s’incapas at a mudare sa data de abrile pro sa sessione de làurea, s’ant a acontzare e adatare sas iscadèntzias issoro. De cada manera non b’ant a èssere tassas in prus.