ROMA. Sos cullegamentos marìtimos dae e cara a sa Sardigna in regìmene de continuidade territoriale los ant a intregare galu a sa Moby-Tirrenia, chi comomai sunt totunu: su Ministeru de sos Trasportos at a prorogare su cuntratu chi diat iscadire su 18 de su mese de argiolas chi intrat. Finas a cando? Una data pretzisa non b’at: totu est cunforma a sos tempos de ammàniu e sestada de su bandu nou, chi, como chi est como, nche giughet a sas cassas de sa sotziedade de su grupu Onorato 72 milliones de èuros a s’annu. Sa nova lompet dae sos sindacalistas Usb Traballos privadu chi custu mangianu at atobiadu a Maria Teresa Di Matteo, visucabu de gabinetu de su ministru de sos Trasportos Paola De Micheli, cando bi fiat s’isciòperu aparitzadu contra de sa serrada de sa sede istòrica de Nàpoli de sa cumpangia e contra de sa farta de unu pianu industriale dae banda de s’armadore.

“Amus espressadu totu sos pensamentos nostros a pitzu de su benidore etotu de Tirrenia acapiadu a nodu cun su bandu imbeniente de continuidade territoriale”, si leghet in una nota isparghinada dae s’Unione sindacale de base”. “Sa dutoressa Di Matteo, sighit su documentu, “at cumpresu su chi est capitende e nos at cunfirmadu chi sa continuidade de como l’ant a trantzire barigada s’iscadèntzia de su 19 de trìulas finas a istèrrere su bandu nou sena inditare tempos pretzisos”. Sergio Ponticelli, sindacalista Usb, bi fiat in s’atòbiu: “Di Matteo nos at naradu chi sa trantzida est pro chistiones petzi tècnicas, isbetende sa sestada de su bandu. Nois amus pedidu chi finas a cando sa Tirrenia incùngiat fundos pùblicos si depant mantènnere totu sos servìtzios e sos postos de traballu: sa tràmuda dae sas sedes chi Onorato bolet serrare diant èssere licentziamentos carotados”, serrat su sindacalista.

A pitzu de custu in martzu de s’annu coladu nd’aiat chistionadu finas s’Antitrust. Istrunchende s’ipòtesi de una pròroga: “Paret chi unu de sos presupostos pro acumprire sa crobada intre de Cin e Moby – iscriiat s’Autoridade garante pro sa cuncurrèntzia -  siat sa trantzida de s’iscadèntzia de como de sa cunventzione, prevìdida pro su 18 de trìulas 2020 a su mancu a su 2022/23. Sa punna de assegurare sa continuidade aziendale de sa sotziedade chi nd’at a essire a pìgiu dae sa crobada dàbbile intre de Moby e Cin finas a pustis de su 18 de su mese de argiolas 2020 non paret de peruna manera una acuntèssida chi potzat giustificare una dèroga a sos printzìpios e duncas a nde fàghere una trantzida de sa cunventzione.