CASTEDDU. Bìsitas firmas dae prus de duos meses. Unu disacatu pro sos malàidos de diabete de Sardigna. Sos dutores narant chi sunt prontos a torrare a cuemntzare, pro intrare in mesu de sa fase 2 de sa Sanidade in Sardigna. Ma isbetant inditos dae sa Regione. E cussa de sos diabèticos est petzi una parte de sos malàidos sardos chi isbetant de èssere curados e contivigiados, a pustis de unu blogu istentosu de sas atividades ordinàrias de sos ambulatòrios impònnidu dae s’emergèntzia coronavirus. Sas bìsitas burradas sunt a chentenas.

Sa denùntzia arribat dae s’assòtziu Medici Diabetologici della Sardegna, pro mèdiu de sos faeddos de su Presidente Regionale, Gianfranco Madau: “Dae prus de una chida est cumentzada sa Fase 2 e sa pregunta chi bolimus fàghere in sas telebìsitas nostras est “Coment’est chi non nos faghides bènnere a sos ambulatòrios?” Sa resposta est chi a dolu mannu peruna cosa est mudada in sos disponimentos regionales e aziendales: ambulatòrios serrados, petzi pro sas urgèntzias”. “In custas chidas – sighit Madau – sa resposta de sa telemeighina at aplicadu su distantziamentu sotziale pro poderare sa pandemia ma como, finas in sas curas ambulatoriales, tocat a torrare a cumentzare cun sas bìsitas in presèntzia de su patziente, mancari chi sighende cun sas bìsitas in telemeighina pro unos cantos de issos.