CASTEDDU. Moent sos finantziamentos a tassu zero pro sas impresas micro e minores de sa filera turìstica. Sa faina est intre de sas primas a livellu natzionale pro sustènnere sas impresas de su turismu corfidas dae sos efetos de s’epidemia Covid-19, e ponet in contu unu fundu de rodadura de 15 milliones de èuros e unu finantziamentu finas a 70mìgia èuros de torrare in 6 annos cun unu ammortamentu in antis de 2 annos.

S’assessora a su Traballu Alessandra Zedda at arresonadu gosi subra sa publicatzione de s’avisu pùblicu: “Sa faina bolet inghitzare unu fundu de rodadura e pro mèdiu de custu istrinare finantziamentos finas a 70mìgia èuros che a crèditu chirografàriu, apostivigados cunforma a sos gastos chi s’impresa chi faghet parte de sa filera turìstica tenet pro sos dipendentes suos, in prus de assegurare licuididade pro amparare su traballu”, marcat s’assessora Zedda.

Su prèstidu est a tassu zero de rembursare in 6 annos dae cando l’istrinant, cun una purrata de ammortamentu in antis de duos annos, “Aa tales de permìtere a sas impresas de non si ghetare in coddos pro tempus meda sos gastos de rembursu, pro cuntrastare sa crisi econòmica cajonada dae s’eemrgèntzia de su coronavirus”, serrat s’esponante de sa Giunta Solinas.

Cun su Fundu, sas impresas de sa filera turìstica chi tenent sos critèrios inditados in s’avisu, ant a pòdere leare sos finantziamentos presentende dimanda a isportellu dae mèrcuris 29 de abrile 2020 in su portale de Sardegna Lavoro.