CASTEDDU. “In Sardigna sos istitutos de crèditu podent antetzipare deretu in dèroga a sos traballadores interessados”. Lu marcat s’assessora regionale de su traballu, Alessandra Zedda, cummentende su parre obligatòriu dadu dae sas Commissiones consiliares cumpetentes chi pertocant sa deliberatzione n° 18/04 dell’8 aprile 2020, cun sa cale sa Giunta regionale intregat sa garantzia, pro mèdiu de sa Sfirs, a sos istitutos de crèditu prus de importu, chi ant sutascritu s’acordu cun Abi natzionale pro s’antètzipu de sos ammortizadores sotziale. “Duncas – marcat s’assessora Zedda – non b’at bisòngiu de perunu acordu, mesa o cunventzione cun sas bancas pro inghitzare s’antètzipu de sa cassa integratzione de sos traballadores.

Sas rechestas de cussos chi lis tocat sa cassa integratzione – sighit s’assessora de su Traballu – las ant dae oe tramudadas a s’Inps chi paris cun sa Regione at comintzadu a bi traballare subra sas pràticas”.

“Su traste de s’antètzipu – serrat s’esponente de sa Giunta Solinas – naschet dae su bisòngiu de agiudare sas persones prus corfidas dae sa crisi manna cajonada dae su coronavirus e est de importu siat pro sos traballadores chi non tenent peruna intrada, siat pro sas aziendas prus minores.