CASTEDDU. Intradas ismenguadas, maschereddas e guantes, limitatziones finas pro s’eucaristia. Finas sa Crèsia s’ammàniat pro sa fase duos. Sa Cunferèntzia episcopale italiana est istudiende unu pianu pr fàghere torrare sos fideles a pregare a in antis de s’altare, l’at a presentare a su ministeru de s’Internu intro de custu fine chida. Sa vida eclesiale diat pòdere torrare a comintzare a pustis de su 3 de maju cun nùmeros ismenguados de sos fideles chi ant a dèpere tènnere mascheredda e guantes. S’at a abarrare a tesu s’unu cun s’àteru, b’at a èssere s’igenizatzione de sos locales, ma at a èssere vedadu a si dare unu sinnu de paghe e s’at a dèpere collire s’eucarestia petzi in sa manu (mesuras giai fatas galu in antis de sa serrada de sas crèsias a sas missas).

“Sas crèsias tenent piessinnos diferentes intre de issas pro mannària e assentu de sos bancos e de sos postos sìngulos”, at naradu Don Giulio Madeddu, diretore de s’Ufìtziu comunicatziones de sa Diòcesi de Casteddu, “sas crèsias non sunt serradas, si podet intrare e pregare, custu no est mai mancadu, cussu chi est fartadu est sa celebratzione pùblica”. E finas si de custos tempos chie prus chie mancu, s’est ammaniadu cun diretas televisivas de sas missas celebradas a sa sola dae sos retores, cussu chi mancat de prus est sa presèntzia de sos fideles e s’ùrtimu saludu a sos mortos”.