CASTEDDU. Cuintales de tziculate chi si guastant in sos depòsitos, tonnelladas de farra e tzùcaru chi non si podent impitare, mìgias de oos torrados a coa, etòlitros de late de ismaltire ma finas impastadoras firmas, òrdines annullados e personale in cassa integratzione o, si andat bene, in fèrias fortzadas. Est a nàrrere perunu ou cun sorpresa, columba o licanias de durches in sas mesas pro sa Pasca Manna de sos sardos.  Est custa sa Pasca marigosa de sos durcheris finas in Sardigna, firmados dae su coronavirus ma finas dae sa burocratzia e règulas istrambecas.

A su setore in s’ìsula comente in su restu de Itàlia, in prus de sa bèndida, ant vedadu mescamente sa produtzione de sos produtos; cunforma a una interpretatzione guvernativa de su Dcpm de su 11 de martzu 2020, in matèria de abrandadura de s’emergèntzia Covid-19, sas impresas artesanas de durcheris, obligadas a serrare, non podent bèndere sos produtos issoro nemmancu cun sa manera de s’asportu chi imbetzes podent fàghere àteras atividades, mentras si podet fàghere sa cunsinna a domo.

Pro s’Assòtziu Artesanu, sa firmada de sa produtzione e bèndida de sas durcherias est una discriminatzione assurda cunforma a sos negòtzios e a sa distributzione manna, chi intamas podent cummertzializare sos durches.