CASTEDDU. Pro cada angione marcadu Igp maselladu dae su primu de martzu a su 30 de abrile sos pastores sardos ant a retzire ocannu 15 èuros cada bèstia. A sos belle ses èuros de su prèmiu crobadu chi retzint onni annu s’ant a annànghere àteros 9 èuros a bèstia pro mòre de su Fondo per le Competitività de sas fileras istituidu cun decretu dae su guvernu pro abrandare sas pèrdidas de su setore agrìculu pro neghe de su Coronavirus. Pro sos angiones no Igp, nàschidos pesados e masellados in Itàlia, semper pro sa matessi purrata, ant a tointamas 6 èuros a bèstia.

De sos 29,5 milliones totales pro totu Itàlia de su Decretu, 7,5 ant a andare a su setore ovinu, partzidos in s’annualidade 2020 – 2021: 3, 5 in su 2020, 4 in su 2021. Chi s’assummant a sos 2 milliones de èuros de su fundu de sos indigentes, destinados pro omogeneizare sos angiones.

De sos 3,5 milliones de su 2020, a sa Sardigna ant a tocare 1 millione e 600 mìgia èuros destinados a 177.778 angiones marcados Igp masellados intre de martzu e abrile 2019.

In totu  s’ant a incungiare 5.600.000. èuros.

Pro sos angiones sardos no Igp intamas l’ant a tocare ocannu 468 mìgia èuros destinados pro 77.991 mìgia angiones masellados intre de su primu de martzu e su 30 de abrile 2019.

“Est unu interventu chi amus chèrfidu meda comente Cunsòrtziu – narat su presidente de su Contas Battista Cualbu – unu interventu de importu in tempos malos pro su pastoriu chi est perdende dinare meda gasi che a sos àteros setores. Nos auguramus como chi custa mesura lafatzant finas a su setore caprinu”.