CASTEDDU. “Sas turnatziones de sos dirigentes anestesistas rianimadores in sos ospidales de Madalena, Bosa, Sòrgono, Bilatzi, Ìsili e Murera sunt suspesas deretu e sas resursas las ant a impitare in atividades chi serbint a sas emergèntzias cajonadas dae su Covid-19”. Est iscritu gosi in una nota inviada a sos presìdios opidalieros dae su Dap (Dipartimentu de sas Atividades Ospidalieras), chi annanghet in prus sa “ricualificatzione de sos servìtzios de primu socursu e centralizatzione de sas organizatziones de Anestesia e Rianimatzione”.

Arribat sa resposta de su NurSidn, su sindacadu de sas professiones infermierìsticas chi pro boghe de Fabrizio Anedda, coordinadore regionale, narat:”Non podimus callare sena cuntestare sa nota trasmìtida dae su diretore de dipartimentu de sas atividades ospidalieras in Ats.In antis ca disponimentos de custa genia depent tènnere unu mìnimu de formalidade pro tènnere unu ghetu de ufitzialidade. Semus difatis chistionende de riconversione istruturale e funtzionale de cumpetentzia de paritzas aziendas sardas, chi diant a su mancu colare dae sos diretores generales/commissàriu Ats, a est ladinu, finas su emmo de s’assessore a sa salude e de su consìgiu regionale. Custu disponimentu, intamas, non est poderadu dae peruna deliberatzione de su diretore generale Ats o Areus e diat resurtare finas sena su nùmeru simple de protocollo aziendale”.