CASTEDDU. “Tocat de programmare unos cantos interventos urgentes pro istantargiare sa sorte de sas istruturas turìsticas, allupadas dae custu blocu cajonadu dae sa pandemia”. Est sa boghe de allarma de su consigeri regionale de su Partidu Sardu d’Atzione Nanni Lancioni, in pensamentu pro sa crisi de s’indùstria de sas vacàntzias in Sardigna, a pustis de sos provedimentos leados pro cuntrastare su coronavirus. “Non cuamus sa timoria chi diat pòdere cajonare custa sessada de sas atividades a pitzu de s’istajone istadiale”.

 

Sa disdetas in sos albergos isulanos sunt arribende a muntones, ma in custas dies sunt burrende finas cussas de làmpadas e de trìulas. “Tocat una terapia forte – serrat Lancioni – Amus postu in contu investimentos de importu pro su cumpartu in sa finantziària. Arribbende s’estiu creschet sa timoria chi s’istajone imbeniente at a tènnere una ismenguada manna de arribos de vacantzieris in s’ìsula, cun unu danu mannu a sas istruturas de retzida. Pro custu cun su presidente Solinas nos impinnamus a agatare resursas a tretu de poderare una boghe de importu de s’economia nostra e torrare a pesare sa filera acapiada a su turismu”.