CASTEDDU. “Sa Regione est traballende cun totu sos sugetos istitutzionales interessados, dae su ministeru a s’Enac e sas diretziones generales de sa Commissione Europea, pro assegurare a sos sardos sa continuidade territoriale aèrea e su diritu chi non si nde podet fàghere a mancu de sa mobilidade”. L’at declaradu su presidente de sa Regione, Christian Solinas, a pustis de s’invitu fatu cun procedura de emergèntzia dae s’assessoradu de sos Trasportos a sas cumpannias aèreas pro sa gestione de su servìtziu de sos volos in continuidade territoriale dae Roma Fiumicino e Milano Linate e a s’imbesse in s’iscalu de Terranos.

“Su quadru de sos cullegamentos aèreos intre Sardigna e su restu de Itàlia tenet bisòngiu de istabilidade e atzivesa – at naradu s’assessore regionale de sos Trasportos, Giorgio Todde – e s’iter chi amus inghitzadu como est unu passu a in antis cara a unu percursu chi depet assegurare a sos sardos su diritu a sa mobilidade e dare mescamente una inietzione positiva a s’economia nostra, a sas impresas e prus a notu a su setore turìsticu”, at serradu s’assessore Todde.

Como sos vetores interessados a s’iscalu de Terranoa tenent 7 dies de tempus pro fàghere s’oferta issoro, posca sas rotas cara a Roma Fiumicino e Milano Linate las ant a intregare cunforma su chi est prevìdidu in s’ùrtimu decretu de pròroga de sa continuidade territoriale chi iscadit su  16 de abrile.

Sa Regione at finas invitadu de sutaiscrìere sa pròroga pro sos cullegamentos dae e cara sos aeroportos de s’Alighera e Casteddu a su vetore chi como chi est como nde garantist su cullegamentu.