CASTEDDU. Sa befe millionària pro sa Sardigna est totu in sa mudadura de unos cantos faeddos. Si colat dae su bisòngiu de “cuncordu” a “intèndida” sa Regione. Chi duncas at a pòdere nàrrere cussu chi cheret, ma a seberare at a èssere semper e petzi su guvernu centrale. Su tema est cussu de su procedimentu nou pro mèdiu de su cales’Agentzia pro sa coesione territoriale podet torrare a classificare sas resursas natzionales destinadas a sas polìticas de coesione de sos ciclos de programmatzione 2000/2006, 2004/2013, 2014/2020 e de cussas de su Fundu pro s’isvilupu e sa coesione. Faeddos imbordulados, chi serbint pro inditare unu munone de dinare. Sa fòrmula pro sa gestione l’ant emendada. E a andare contra a cussu chi mutit “una istratallada centralista” est su deputadu de Forza Italia Ugo Cappellacci, chi pedit “deretu s’abrogatzione de sa norma fura-Regiones”.
“Una ghelea manna chi, in prus de èssere illegìtima dae su ghetu costitutzionale pro sa farta de respetu de su princìpiu de collaboratzione leale traighet s’ispìritu de sas polìticas de coesione, chi punnant a mòere, no a ismanniare, sa diferèntzia econòmica sotziale, sighit s’ex presidente de sa Regione, “Ischimus chi sa Sitzìlia at giai presentadu unu recursu a sa Corte Costitutzionale. Subra custa batalla – at serradu Cappellacci – amus a pedire s’agiudu de totu sas persones de bona voluntade, chi non si bolent rèndere a in antis de unu tentativu torra de istrecare sas Autonomias, sos territòrios e sas comunidades chi bolent pesare sa sorte issoro, non collire sos sèberos fatos dae artu o furas de resursas de fundu pro dare unu presente a sas regiones nostras e torrare unu benidore a sas generatziones noas”.
