CASTEDDU. In Sardigna bi sunt 60 persones in isulamentu che mesura de preventzione contra a su coronavirus: sunt totus sugetos chi, cun s’influèntzia o nono, sunt torrados in s’ìsula in sas dies coladas pro una purrata de aposentada in sas zonas rujas de su nord Itàlia. Sos nùmeros los at dados, in consìgiu regionale, s’assessore regionale a sa Sanidade Mario Nieddu, in s’interis de sa dibata cunvocada pro chistionare de sas contramesuras leadas dae sa Regione pro istransire su contàgiu in s’ìsula.
“Batòrdighi persones sunt in isulamentu fiduciàriu in su centru”, at naradu s’assessore in àula. Est chistionende mescamente de una trupa de Paulle chi fiat mòida a Venètzia pro bìere su Carrasegare e como sunt inserradas in domo issoro compudadas, pro iscumproare si b’ant sìntomos.
“Àteras noe sunt in isulamentu in su sud de sa Sardigna e 35 sunt compudados” duncas monitoradas dae sa Protetzione civile e dae su sistema sanitàriu, “in cabu de susu”. Nieddu at dadu finas su nùmeru de alarmes farsos, una bintena in totu sa Sardigna, e de sos tampones fatos pro averiguare sa presèntzia de su coronavirus. Sunt istados totu negativos.
S’assessore a sa Sanidade at finas fatu sos contos de una presentzia de contàgiu in Sardigna, si si nche fuit dae sos cuntrollos: leada in cunsideru una capatzidade de infetare belle de su 35-40% de sa populatzione, in s’ìsula si diant contare 400 contàgios. Su 5% de custos, semper cunforma a sas istatìstica, si diant pòdere agatare in una situatzione crìtica. Duncas si diat chistionare de 20.000 patzientes totu paris chi diant tènnere bisòngiu de sa terapia intensiva. “Bidos custos nùmeros, chi est mègius de non los connoschere in sa realidade, at naradu s’assessore, “aiamus pedidu de pòdere leare mesuras prus fortes pro istransire su contàgiu, ma su guvernu at torradu su nono: pro custu amus murrungiadu”.
In àula ant chistionadu finas de sos ordinativos mannos pro frunire su personale mèigu de trastes de amparu contra de su contàgiu: intre de sas àteras cosas, ant comporadu finas 24 mìgia maschereddas.
