CASTEDDU. Sunt faghende sos primos pagamentos a sos massajos intregados dae Argea che organismu pagadore de sa Regione Sardigna. In custas dies sunt istrinende, respetende s’iscadèntzia de su 30 de santandria imbeniente, sos antètzipos de sas dimandas presentadas dae 13.345 benefitziàrios, pro in totu 57 milioni 234.961 èuros, de sas mesuras acapiadas a terrinos e a animales 10, 11 e 14 de s’annualidade 2020 de su Programma de isvilupu rurale.

“Su ruolu de organismu pagadore regionale de Argea – marcat su presidente de sa Regione, Christian Solinas – nos permitit de gestire a manera direta, in una relata lestra cun sa Commissione Europea e de allestrire sos pagamentos, cumbeniosu meda pro sos massajos nostros e pro totu su compartu. In unu cuntestu chi afòrtiat s’autonomia de sa Regione, sighimus gosi in sa caminera de simplificatzione amministrativa e truncada de sa burocratzia, duas de sas punnas chi custa Giunta si fiat posta dae comintzu”.  

“unu resurtu de importu – narat s’assessora regionale de s’Agricultura, Gabriella Murgia – arribadu nointamas sas dificultades mannas cajonadas dae s’emergèntzia sanitària e econòmica chi est sighende dae meses, otènnidu pro more de su traballu mannu de s’iscuadra de s’Assessoradu, de sa dirigentza e de totu su personale de Argea, a pustis de su reconnoschimentu de organismu pagadore regionale acuntèssidu su 16 de santugaine coladu. Amus crèidu meda a custu ruolu nou de s’Agentzia, chi at a tènnere semper prus balia istratègica a sustennu de sos massajos nostros”.