CASTEDDU. Cussu turìsticu in Sardigna est unu de sos setores prus corpidos dae sa crisi cajonada dae meses de epidemia de Covid. Pro custu s’Ente Bilaterale Turismu Sardigna at chèrfidu pònnere dinare pro sos titulares de impresas de su turismu e dipendentes in dificultade pro neghe de su Coronavirus: 350 mìgia èuros intregados a sas aziendas assotziadas chi sunt in règula cun su versamentu de sas cuotas contributivas. Sas àreas de interventu apostivigadas in su “Acordu pro Interventu Istraordinàriu Sustennu a su rèditu 2020 – Emergèntzia Covid 19” firmadu dae sas partes sotziales de s’Ente (Faita, Federalberghi, Fiavet, Fipe, Fisascat Cisl, Filcams Cgil, Uiltucs) sunt bator: s’atividade formativa, sa preventzione e sa seguresa in sos logos de traballu, su contributu de istajonalidade pro su sustennu a su rèditu de sos traballadores istajonales e, in fines unu pro totus sos traballadores cun fìgios a càrrigu.

“Su Covid at segadu sas ancas a paritzas aziendas chi no ant pòdidu gosare mancu de unu sustennu econòmicu istatale o regionale”, at naradu su presidente de s’Ente Bilaterale Turismo Sardegna, Giuseppe Atzori, “pro custu amus pensadu finas nois a cussos chi, pro neghe de sa pandemia, no at a pòdere traballare o at faturadu prus chi ismesadu cunforma a ocannu coladu”.

“Sas categorias de interventu las amus sebaradas cunforma a sos bisòngios chi amus iscumproadu intre sas aziendas e sos traballadores”, annanghet Gian Mauro Pileri, visupresidente Ebts, “pro respetare totu sas normas anticovid e tènnere una rechesta prus simple rennovende su situ nostru e insertende sos mòdulos adatos chi si podent cumpilare impitende una procedura intuitiva meda”.

S’Ebt est unu assòtziu no profit prevìdidu dae su Cuntratu Colletivu Natzionale de Traballu de su setore Turismu pro frunire servìtzios a sos traballadores e a sas impresas. Est unu traste pro s’acumprida de sas fainas inditadas dae sa cuntratatzione colletiva in matèria de ocupatzione, mercadu de su traballu, formatzione e cualificatzione professionale; faghende e promovende in prus fainas de istùdiu e chirca pro su cumpartu. Sas aziendas depent versare su 0,04% de sa massa salariale (paga base + contingèntzia) de su cale su 0,20 a càrrigu de s’impresa e 0,20 a càrrrigu de su traballadore. Sa farta de versamentu cajonat una no aplicatzione de su CCNL e su non reconnoschimentu de incentivos e isgràvios a pitzu de su costu de traballu.