CASTEDDU. B’at s’acordu pro s’amparu de sos belle 550 dipendentes de Air Italy. “Giai dae s’incràs de sa licuidatzione de sa Cumpannia, sa Regione at leadu s’impinnu de inghitzare fainas cuncretas pro s’amparu de totu sos traballadores e se su know how chi b’at in s’azienda. S’acordu de oe marcat unu passu a in antis mannu pro s’amparu de su traballu pro more de polìticas de integratzione postas in atu chi ponet a pare belle 550 dipendentes impiegados in sa sede de Terranoa”. L’at declaradu su presidente de sa Regione, Christian Solinas, a pustis de sa firma de su verbale integrativu de s’acordu sindacale fatu custu mangianu intre de s’Assessoradu de su Traballu, sas organizatziones sindacales e Air Italy, pro more de sa cuncertatzione de Aspal, Agentzia pro sas polìticas ativas de su traballu, rapresentada dae su commissàriu nou istraordinàriu, Aldo Cadau.

In s’interis de s’atopu, s’assessaora de su Traballu, Alessandra Zedda, at mustradu su istadu de acumprida de su Pianu de sas polìticas ativas pro sa promotzione de s’insertada a nou in traballu de sos dipendentes de Air Italy, i prus chi de sos impinnos chi subra de custu sa Regione bolet sighire a in antis.

“Isetende sa definitzione cumplessiva de sa vertèntzia amus inghitzadu unu percursu a tales de abrandare sas cunsighèntzias de sa disocupatzione, sapende-nos chi sos ammortizadores sotziales non sunt bastantes. Su resurtu de oe, otènnidu cun sa partecipatzione istraordinària e sa cumpartzida de sas organizatziones sindacales e de s’azienda e su de pònnere in sa chistione sos traballadores etotu, est su sinnale de importu chi sa Regione si cunfirmat parte ativa in su processu formativu chi punnat a mantènnere e avalorare sas cumpetèntzias professionales achiridas dae sos traballadores matessi de sa cumpannia aèrea”, ponet a craru s’esponente de sa giunta Solinas.