CASTEDDU. "M’isbeto chi sa Regione agatet sa solutzione intro de su 25 de santugaine, sinono penso ci sas eletziones si depant trantzire in cussos Comunes ue eletores positivos, o in brantena o in isulamentu, non potzant espressare su votu issoro dae domo”. Est sa declaratzione de Eugenio Zoffili, coordinadore regionale de sa Lega in Sardigna, chi comente est s’abbitu suo ponet in facebook sa nova de s’Ansa chi lu pertocat. Su deputadu, de Erba (Lombardia) ischit ite cheret nàrrere a no essire dae domo: est positivu isse etotu. E pensat a totu cussos chi no ant a pòdere votare ca in bidda issoro – gasi at apostivigadu sa Regione – non b’at unu ospidale cun unu repartu Covid ue pònnere sas urnas. Est a nàrrere: sos positivos ant a pòdere votare petzi in Nùgoro, a totu sos àteros (chi in s’ìsula bi sunt tremìgia sardos in isulamentu domiciliare) chi istant in sas 155 biddas chi sobrant tenent negada sa possibilidade de seberare su sìndigu.

“Acò proite, in custas circustàntzias”; narat Zoffili, “sas eletziones non si diant dèpere fàghere. Sa Lega bolet chi sos positivos potzant votare: lu naro che positivu, ca si faghent sas eletziones in su Comune meu mi diat dispràghere meda de no espressare su votu meu”.