CASTEDDU. Sunt arribende 6 milliones d e èuros pro sos agiudos de minimis a sas impresas de pisca e abbacoltura e 3 milliones de èuros de fundos diretos pro sas aziendas agrìculas de sos setores florovivaiasticos, ortìcolu e vitivinìcolu chi, pro neghe de s’emergèntzia epidemiològica, ant tentu dificultade o impossibilidade a bèndere sos produtos issoro. L’at detzìdidu sa Giunta regionale cun duas delìberas, propostas dae s’assessora, Gabriella Murgia, aprovadas in s’ùrtima setziada.

“Sa rutòrgia de sa dimanda de sa produtzione cajonada dae s’emergèntzia sanitària”, ponet a craru Gabriella Murgia, “at nòghidu meda a paritzas aziendas, chi ant bidu andende male sos bilàncios issoro agatende-si in cunditziones piessinnadas de bisòngiu pro s’istantargiada produtiva. E est pro custu chi amus istituidu unu regìmene de agiudos de minimis subra su Fundu de solidariedade regionale de pisca e abbacoltura pro parare fronte a sos dannos cajonados dae calamidades naturales, emergèntzias sanitàrias, àteros eventos ecetzionales e eventos mèteo climàticos.

“Sas restritziones postas dae su lockdown”, annanghet s’esponente de sa Giunta Solinas, “ ant finas segadu sas ancas in parte a sa fase de accabu de su ciclu de produtzione agrìcola primària e sas atividades acapiadas”. Sos setores destinatàrios de s’interventu sunt cussu florovivaìsticu, ortìcolu (a su mancu pro iscartzofa, ispàragu e ortalìtzia in fògia) e su cumpartu vitivinìcolu (sas cantinas). Sos 3 milliones de èuros los ant partzidos de custa manera: 800 mìgia pro su florovivaìsmu, unu millione pro su cumpartu ortìcolu e unu millione e 200 mìgia èuros pro sas cantinas. Pro calculare sa suventzione erogàbile s’at a cunsiderare s’ismenguada de su faturadu acumpridu in sa purrata martzu-maju 2020 cunforma a sa purrata de s’annu in natis.

“Sas impresas florovivaìsticas 2marcat s’assessora Murgia, “ant tentu cunsighèntzias graes, pro neghe de  su blocu istentosu impostu pro sas celebratziones religiosas e fùnebres e de sa serrada de sos esercìtzios cummerciales de detàlliu. Custu at cajnadu s’impossibilidade de agatare solutziones commertziales a produtziones  giai inghitzadas, cajonende suferèntzias finantziàrias pro farta de licuididade. Su setore ortìcolu intamas at tentu paritzos dannos de produtzione, irreversìbiles pro more de s’impossibilidade de rifornire sos mercados de referèntzia, sas atividades acapiadas a su sistema de ristoratzione e acollida e sos mercados rionales. Sas cantinas ant tentu posca sa dificultade de cummertzializare finas pro neghe de sas retritziones subra sas esportatziones impostas dae paritzos guvernos europeos e extraeuropeos”.