CASTEDDU. Mudat su programma. No l’ant a fàghere cras, gasi comente s’ibetaiat, sa setziada de su consìgiu regionale cando s’àula diat àere dèpidu arresonare de sa serrada de Air Italy. “Sa trantzida l’amus fata a tales chi si presidente de su consìgiu regionale Michele Pais e su presidente de sa Regione, Christian Solinas podiant leare parte cras, a mericeddu, a unu atòbiu in su ministreru de sos Trasportos”. In logu de s’assemblea ue aiant dèpidu chistionare de una motzione, s’at a fàghere “unu atòbiu intre de sindacados, sos traballadores de Air Italy e sos consigeris regionales”.
Su presidente Michele Pais dae Roma – sighit sa nota – torrat a ammentare sa punna sìnchera de tirare a in antis cun sa giunta regionale una batalla totu paris pro sarvare sa cumpannia aèrea: “Est tempus de s’unidade e de cumpatesa. Non bi depent èssere partziduras ideològicas o de partidu. Sa boghe ebbia chi depet arribare a Roma est cussa de sa Sardigna”. Sa voluntade de atopare sas partes sotziales pro Pais est unu sinnale de abertura: “Penso chi tochet a intèndere deretu sos traballadores subra sa trassa pro istesiare de su totu sa serrada de sa cumpannia chi, in prus de tènnere efetos degollosos in su traballu, diat isciusciare finas su cumpartu de sos trasportos e de su turismu de totu s’ìsula”.
Su presidente torra un’àtera borta at brindadu a totu sos parlamentares sardos e sos consigeris regionales a sustènnere sa vertèntzia Air Italy giòbia in Roma a sas 10.30 in sa pratza a in antis de Palazzo Chigi e posca a in antis de sa sede de su ministeru de sas Infrastruturas e de sos trasportos in s’interis de s’atopu cun sa ministra Paola De Micheli.
S’opositzione retzit de mala ispètzia sa nova de sa trantzida de s’atopu de su consìgiu: “B’at unu impinnu prus de importu de sarvare 1200 dipendentes e su benidore de sa continuidade territoriale aèrea?”. Intzìghidat Eugènio Lai (Leu), “Non faghedas finas custa borta che a s’abistrussu, cuende sa conca suta s’arena ca non agiudat a nemos, galu prus pagu bos nche leat sas responsabilidades mannas chi tenides”. Pro sos Progressistas, Francesco Agus at imbiadu una pec a sa presidèntzia de su consìgiu, ue espressat “cuntrariedade manna subra su sèberu suo. Sa setziada l’aiant cunvocada cunforma a unu artìculu de su regulamentu chi torrat a leare s’inditu de s’artìculu 20 de s’Istatutu, subra su cale amus giuradu totus. Sas possibilidades derogativas chi li pertocat non sunt in su disponimentu de su presidente.
