CASTEDDU. Arribant 300 mìgia èuros pro sustènnere sas produtziones regionales cun marcu Dop e Igp. A pustis de una temporada bona, ue bi fiat Gigi Riva comente testimòngiu de sa faina chi est essida in messàgios e publicidades in paritzos mèdia, cun una delìbera aprovada in s’interis de s’ùrtima setziada ant postu àteros 300 mìgia èuros. “Custas resursas in prus – narat Christian Solinas – sunt unu sinnu cuncretu de s’atentu dae banda de sa Giunta pro s’avalorada de sas ecellèntzias agroalimentares chi sa Sardigna podet ofèrrere in sos mercados. S’amparu de su cumpartu colat finas dae s’àndala de una comunicatzione atziva, fata pro totu sos consumadores, de sa calidade arta de sos produtos mègius nostros”.

“Semus parende fronte de cada manera a sos efetos de sa crisi econòmica mala chi est corpende totu sos setores prodtivos, finas cussu agroalimentare – ponet a craru s’assessora de s’Agricultura, Gabriella Murgia – comente cunsighèntzia meche de sas mesuras astrintòngias acapiadas a s’emergèntzia epidemiològica de su Covid-19, chi ant limitadu sas possibilidades de moimentu e mudadu sos avesos de còmpora de sa populatzione, noghende finas a sos consumos. Posta in cunsideru sa situatzione de pagu seguresa de sos mercados ca est sighende custa emergèntzia pro neghe de s’epidemia semper prus Sos agiudos postos in contu los ant a istrinare comente servìtzios agevolados pro mèdiu de su ruolu tentu dae sos Cunsòrtzios de amparu, pro sos produtores chi nd’ant a gosare a s’accabu, pro campagnas de informatzione in sos mèdia, publicatziones, dies de informatzione, atòbios, atopos de traballu, in presèntzia o virtuales. Sa dotatzione finantziària in totu est de 300 mìgia èuros cun unu massimale de agiudu pro progetu de 60 mìgia èuros. S’at a pòdere cobèrrere su 100% de sos gastos chi si podent ammìtere. Su programma de interventos est intregadu a s’Agentzia Laore, incarrigada de sa retzida e de s’istrutòria de sas dimandas de contributu e de sa cuncessione e istrinada de sos agiudos.