CASTEDDU. In Sardigna sighit a ismenguare su nùmeru de sos fogos. “pro su segundu annu de fila a pare registramus valores bonos dae su ghetu de sos nùmeros de fogos e de su terrinu ue ant abrusiadu”. Lu narat s’assessore a sa Defensa de s’Ambiente Gianni Lampis a costados de sa cunferèntzia de presentatzione de sa Campagna Contra a sos Fogos 2020, chi ant fatu custu mangianu in Casteddu, in sa sala reuniones de s’Assessoradu regionale de sa Defensa de s’Ambiente.

 

Cunforma a sa mèdia de sos ùrtimos deghe annos s’ismenguada est de su 18%. Essit a pìgiu unu calu (de su 34%) de su terrinu abrusiadu. “Custu mustrat a craru chi sa màchina contras a sos fogos chi sa Regione at ammaniadu est istada atziva e lestra”, narat s’assessore Lampis. “Custu est acuntèssidu pro more de su sa sienda umana e de sos mezos chi b’amus postu, 11 elicòteros, su Super Puma, prus de 7mìgia persones chi cada die ant asseguradu sa seguresa de sos sardos. Sa Regione at impitadu 30 milliones de èuros pro sa Campagna Contra a sos Fogos, mancari esseret una purrata mala chi nche moet resursas a sa programmatzione polìtica. Corpu Forestale, agentzia Forestas, Protetzione civile, cumpannias Barraccellares, Corpus natzionale de su fogu ant collaboradu pro otènnere custos datos”, annanghet. “Apo pedidu a su Corpus Forestale de ismanniare sa faina de averiguada e custu at batidu custos resurtos”.

 

Mancari gasi, nointamas sos datos bonos, su nùmeru de sos fogos est galu artu. Ocannu bi sunt istados prus de 2500 fogos de custos belle sa metade cun terrinos in toru de 1000 metros cuadros. Pro s’ocasione Lampis at torradu gràtzias a totu su personale chi at leadu parte a sa campagna contra a sos fogos e at ammentadu a Alessandro Diana, su voluntàriu pitzinnu mortu custu estiu in unu incidente in sa bia cando fiat andende a istudare unu fogu.