CASTEDDU. Su virus est comomai isparghinadu in totu Sardigna. Mescamente in famìlia: custu faghet sa cosa mala a isboddicare. S’estiu pro sos dutores est coladu chena mancu una die de fèrias. Su Santissima Trinità in Casteddu oe contat prus de 140 ricoverados. Pitzocos, prus mannitos, cun àteras maladias in carena, ma bi sunt finas positivos chi non tenent su sistema immunitàriu indebilitadu. Los curant a totus, assistidos dae sos càmices biancos chi sunt pro issos cussos chi los contivìgiant.

Nemmancu unu faeddu de consolu dae banda de sos parentes, petzi sos mèigos podent intrare e tènnere cuntatos cun issos, s’arriscu est mannu. Sas bardaduras sunt de òbligu, su nùmeru de casos positivos ismànniat die cun die.

E a parre de su responsàbile de sas Maladias Infetivas de su Santissima Trinità de Casteddu, galu puntu de referèntzia covid pro su sud de sa Sardigna, “tocat a castiare chie presentat sintomatologias, non a su traciamentu”. Sa cajone? “Comomai su virus nch’at luadu su logu”.

Duncas, si in antis si contaiant focolajos inserrados, e su traciamentu de sos cuntatos teniat sensu, oe chi su virus est foras de cuntrollu creschet finas su nùmeru de sos sintomàticos. Petzi oe de 243 casos, 80 los ant buscados a pustis de unu suspetu diagnòsticu. Sos postos letu bi sunt, nen fartant in terapia intensiva, ma finas cussos diant dèpere arribare.

Mancant traballadores, ma a su chi paret finas dae custu ghetu semus traballende pro buscare àteros cullegas. Ins’interis b’at cada die unu anda e torra de ambulàntzias foras de su Prontu Socursu de su Santissima Trinità. Unu iscenàriu chi mai si fiat bidu in antis de sa pandemia. “Si mèigu de base est de importu mannu: si non funtzionat su filtru suo, sos malàidos arribant a su Prontu Sucursu”, narat Angioni.