CASTEDDU. A sos operajos de s’agentzia Forestas non l’agangat e si chèsciant pro s’incuadramentu cuntratuale chi su consìgiu regionale at aprovadu (cun 30 votos a favore) sa chida colada. “Sa minoria aiat lassadu s’àula, gasi comente a unos cantos consigeris de majoria – denùntziant sos traballadores – chesciosos pro s’incuadramentu nou, ca lu oensant illegìtimu e de cumpetèntzia ebbia de cuncordu sindacale e cuntratuale”. Sos oparajos de Forestas, dae su 1° a su 4° livellu, custa borta sunt dispostos a totu pro si fàghere reconnòschere sos diritos issoro: “Nos paret una befe, nos ant istrecadu sa dinnidade nostra”, narant.

“Sas impromìtidas fiant àteras – intzìghidant – si chistionaiat de unu incuadramentu moende dae sa categoria (b1) finas a lòmpere a su (c1), intamas sa majoria de su consìgiu regionale s’est imbentada sa categoria (b0), chi no esistit. Si prenant sa buca narende chi sos operajos de forestas sunt de importu pro sas fainas contras de su fogu e sa protetzione civile: bene, tando pedimus chi reconnoscant sa balia nostra”.

E annùntziant una rebellia: “Semus prontos finas a fainas estremadas si serbit, comente a firmare totu sas fainas contras de su fogu. Totu nois operajos de Forestas nos semus sortidos pro nos fàghere reconnòschere sos diritos nostros de traballadores e l’amus a fàghere finas de forma legale si nde b’at bisòngiu. Totu bois consigeris regionales castiade in televisione sos fogos, in s’interis chi nois semus in su fronte chi lu gherramus arrischende sa vida a fitianu, tenezas respetu e tenide bos contu”. Duncas sos dipendentes de Forestas custa borta parent de a beru seguros de amparare su traballu issoro. S’acuntèssida paret peleosa meda e arriscat de fàghere firmare totu sas fainas de Forestas, dae cussas contras de su fogu a sas fainas fitianas in intros de sos padentes.