CASTEDDU. Totus de acordu subra sa pròroga de su Pianu Domo. Majoria e opositzione in consìgiu regionale peroe peleant subra s’interpretatzione sìnchera de su pianu paesagìsticu regionale. Una norma chi serbit, a parre de su centrudereta, pro iscblocare sos traballos in sa Tàtari.S’Alighera. Una manera de isciusciare sas nòrmas chìrdinas de tutela a parre de su centrumanca. E in s’inetrisparent chi siant torrados sos iscòrrios intre Forza Italia e sardistas, a pustis chi eris s’atòbiu de sa commissione Urbanìstica est brincada pro su sèberu de su presidente Giuseppe Talanas, in su parlamenteddu subra su testu nou. Cun 1500 emendamentos de batallare.

“S’ispeculatzione edilìtzia est arribande” narat Roberto Li Gioi, consigeri regionale de su Movimento Cinque Stelle, “sunt chirchende de isciusciare su Ppr, a tales chi totu sas costeras, sos benes identitàrios e totu sos terrinos de massaria siant a disponimentu de una ispeculatzione edilìtzia”. S’opositzione at naradu chi est a disponimentu pro andare in s’àula deretu cun una pròroga de su Pianu Domo (ue nch’est giai in una delìbera de su mese de idas coladu chi non tenet nemmancu una iscadèntzia), ma sa firmada arribat a in antis de una interpretatzione sìnchera”.

“Su 30 iscadit su Pianu Domo”, at annantu dae su PD Valter Piscedda, “e su 2 de trìulas iscadit sa presentatzione de sos documentos dae banda de sa Regione pro su recursu de sa Tàtari-S’Alighera. Como sa majoria, cando mancant 10 dies, chircat de iscarrigare a pitzu de s’opositzione s’arriscu de non prorogare su Pianu Domo. Noi lis torramus custas acusas a coa e sa responsabilidade de cussu chi est acuntessende”