Limba Sarda

Etichetas tramperas de s’angione sardu Igp, inghitzant sas denùntzias

  ITA      SRD

Agnello

CASTEDDU. “Sas etichetas tramperas subra s’angione de Sardigna Igp chi sunt girende in sos social faghent a befe sa fiantza de sas persone e de su traballu sèriu e peleosu de unu muntone de pastores. Comente a Cunsòrtziu de s’angione de Sardigna Igp amus giai denuntziadu a sa Politzia postale e a sa repressione frodes custas farsidades e amus a persighire semper e totue custas fainas chi noghent e chircant de iscualificare su traballu de sos pastores nostros in prus de cajonare cunfusione in su consumadore in vantàgiu de sas frodes alimentares verdaderas”.

Su Cunsòrtziu est arrenegadu e denùntziat custas trampas ghi girant in sos social mòidas dae faddinas de unas cantas cadenas de ipermercados. S’ùrtima est acuntèssida in abrile 2020  cando una cadena de supermercados aiat postu unu pee de angione de Sardigna Igp chi fiat pàschidu e maselladu in Grecia. Una faddina crara chi peroe at cajonadu unu trèulu.

“ a su Cunsòrtziu sunt arribadas partzas sinnalatziones. Calicunu at chircadu finas de mudare s’allega Grecia cun cussa de Olanda. Una eticheta chi at fatu su giru de Italia, ca bi sunt istadas paritzas sinnalatziones. E eris est mòida un’àtera eticheta farsa de su 12 de santandria 2020 semper inditende s’angione de Sardigna Igp, ue s’inditat chi est pàschidu, maselladu e ammaniadu in yugoslavia, Istadu chi no esistit prus dae su 2003.

“Semus averiguende e sinnalende a sa politzia postale custas etichetas farsas – marcat su presidente de su Contas – chi si leat befe de sa bona fiantza e su traballu de sas persones onestas. Torramus gàtzias a totu cussos chi dae cada leada de Italia nos ant fatu e faghent galu sinnalatziones: cheret nàrrere chi non semus solos in custa batalla contras a sos bandidos de su màndigu ca su consumadore est semper prus abbistu e si nde sapit.Pedimus agiudu finas a sos giornalistas, ca est una batalla chi nos biet totus in sa matessi ala mancari si calicunu at inditadu che beras a custas etichetas leende sa fiantza de su consumadore e noghende a sos pastores. Bos pedimus de nos cuntatare siat pro telèfono a su nùmeru 334.1013034 chi pro mail in Questo indirizzo email è protetto dagli spambots. È necessario abilitare JavaScript per vederlo..

“Luego sos dannàrgios in malafide o pro brulla chi ant mudadu sas etichetas ant a connòschere sa giustìtzia, assegurat su presidente de su Cotas Alessandro Mazzette, ammentende chi s’angione sardu sighit unu disciplinare chìrdinu chi pro otènnere su màrchiu depet èssere nàschidu, pàschidu e maselladu in Sardigna, chi benit dae unu mascru e una berbeghe finas custos sardos. Semus finas pendende a su traciamentu de su DNA pro afortiare sas compudadas in sos bangales frigo”.

 

 

contributo regione sardegna sito.jpg