CASTEDDU. S’emergèntzia Covid-19 no at firmadu sas donatziones e sos trapiantos de òrganos e tessutos in Sardigna. “S’impatu chi s’epidemia est boghende a campu subra su sistema sanitàriu nostru at a seguru cajonadu unu assussegu de sas atividades de sos trapiantos e de sas donatziones finas in Sardigna, in lìnia cun su chi est acuntessende in su restu de su Paisu. S’andanta bona registrada a comintzu de s’annu at frenadu in sas ùrtimas chidas, ma no una sessada e su bilantzu est galu bonu. Dae ghennàrgiu a abrile ant fatu in s’ìsula 22 trapiantos, ses in prus cunforma a sa matessi purrata de s’annu in antis, de custos 7 de rene, 3 de coro, 11 de figadu e unu trapiantu crobadu figadu-rene. Unu resurtu fatu pro more non petzi de s’organizatzione e de sas grandu professionalidades chi bi sunt in s’ìsula nostra, ma fina pro more de sa sesnsibilidade e altruismu de sos Sardos chi ant dadu su cunsensu issoro a sa donatzione. Dae custu ghetu non cherimus abrandare s’atentue amus a sighire a pònnere in campu onni traste possìbile pro assegurare una atividade chi non si nde podet fàghere a mancu pro sarvare sas vidas umanas”.

Lu narat s’assessore regionale de sa Sanidade, Mario Nieddu, sa note in antis de sa de 23 Dies natzionale pro sa donatzione e su trapiantu de òrganos e tessutos, ammaniada pro su 19 de abrile. “Un’ocasione – narat s’esponente de sa Giunta Solinas – chi at semper acumpangiadu fainas e progetos pro informare sos citadinos de custu tema de importu. Ocannu pro neghe de sas mesuras pro istransire s’isparghinada de su contàgiu, non b’ant a èssere atividades pùblicas, ma sa pratza at a èssere virtuale, pro mèdiu de sa campagna ‘Damus su mègius de nois’ promòvida dae su Centru natzionale trapiantos chi nd’aderit finas su Centru regionale trapiantos de Sardigna, semper ativu in sa divulgatzione e sa promotzione de sa cultura de sa donatzione.