Limba Sarda

Solinas in Bruxelles: “Advisor pro sa continuidade in Sardigna, impinnos bonos”

  ITA      SRD

Solinas-commissione-Ue

BRUXELLES. “Sa commissione at ascurtadu interessada sos parres de sa Regione e at asseguradu de sighire a traballare paris pro nche barigare sos impèigos prus de apretu”. Sa nota chi torrat contu de su chi est essidu dae s’arresonada in s’atòbiu fatu in Bruxelles intre de su presidente de sa Regione Christian Solinas e sa diretzione generale Trasportos de sa commissione UE  est arribada a sero. Ogetu: sa continuidade territoriale aèrea de sa Sardigna. Su regìmene de oe in die iscadit su 17 de abrile: dae cussa die non sunt prus a disponimentu sos billetes (francu si non cun sas cumpannias low cost). E sa Regione est punnende a tènnere una trantzida pro buscare tempus e ammaniare su bandu nou chi assegurat sos cullegamentos. A s’atopu , chi ant fatu a mangianu mannu, at leadu parte finas s’ambasciadore Michele Quaroni, rapresentante permanente annantu pro s’Itàlia a s’UE.

Unu primu cara a cara intre de su guvernadore e Europa, cussu de oe, chi faghet parte de un’arresonu cun s’esecutivu UE “articuladu e imborduladu”. Sa nota – chi diat dèpere èssere istada cuncordada intre de sos chi ant leadu parte – marcat chi “su presidente at rapresentadu s’urgèntzia de serrare de su totu s’acuntèssida a pustis de sos arresonos istentosos de sos meses colados”.

Essit a campu chi Solinas apat asseguradu chi “sos ufìtzios regionales sunt giai traballende pro commissionare luego unu istùdiu a unu advisor indipendente de inghitzu pro certificare sa mudadura de su mollu e sa polìtica tarifària, gosi de fàghere bandos noos chi ant a dèpere abarrare publicados pro ses meses sighidos, cunforma a su regulamentu UE in matèria”. “Subra su respetu de custa incarrerada e de unu cronoprogramma chi nche giugat sena retardos a s’intrada in vigèntzia de unu regìmene nou de òneres de servìtziu pùblicu si fundat sa possibilidade de assegurare, isbetende sa gara, sos cullegamentos de s’ìsula segundu su sestu chi tenet immoe”, serrat gosi su documentu.

 

contributo regione sardegna sito.jpg