CASTEDDU. "Su Guvernu lassat in foras su Pecorino romano (ma finas su Pecorino srado e su Fiore sardo) dae su bandu natzionale pro pòberos de 50 milliones de èuros”. A lu denuntziare est su presidente de su Cunsòrtziu Salvatore Palitta, chi at iscritu pro custu una lìtera a sa ministra de s’Agricultura Teresa Bellanova. Su bandu l’aiant sestadu pro favorèssere su cumentzu nou a pustis de sa pandemia de su setore agroalimentare e, in su matessi tempus, pro agiudare sas famìlias pòberas: su Guvernu achirit duncas pro 50 milliones sos produtos postos in cunsideru (agiudende duncas sa filera de produtzione) e los intregat a entes caritatèvoles.

“Nos resurtat chi in s’ammàniu de custa allistada de produtos de isertare in su bandu – iscriet Palitta – si nche siant ismentigados o apant bogadu a foras su Pecorino romano e sas àteras Dop cun late de berbeghe chi naschent in Sardigna. Pro custu semus dispràghidos meda, ca sos problemas acapiados a sa pandemia ant corpidu sena perunu sèberu totu sas indicatziones geogràficas e sas Dop italianas. Non bio proite dae sos interventos nche depant bogare a foras su Pecorino romano, su Pecorino Sardo e su Fiore sado. Custu no lu bagiulamus”, atacat.

Su presidente de su Cunsòrtziu faghet gasi unu apellu a sa Regione e a sos parlamentares sardos: “Pedimus unu interventu luego: non si podet bagiulare chi s’Istadu italianu fatzat cosas sena s’abbigiare chi esistint sas Dop sardas chi, intre de s’àteru, sunt finas agradèssidas e pedidas in sas piataformas de bèndida e de sos entes caritatèvoles.