CASTEDDU. “Confirmo chi s’essida de sos bandos pro sa promotzione de sa cultura cinematogràfica de s’annualidade 2020 est arribende luego e, finas, in antètzipu cunforma a sos tempos de programmatzione fitianos”. L’at marcadu s’assessore regionale a sa Cultura , Andrea Biancareddu, torrende isceda a sa rechesta fata de reghente sae s’Ats “Le Isole del Cinema”, pro sos festival de Tavolara, Madalena, U Pàize/Carloforte, Casteddu e Asinara, chi ant prantu pro su coronavirus. “Apo pensadu chi si depiat isbetare carchi die pro bìere e tènnere una mirada prus ampra de sos interventos econòmicos a livellu natzionale e regionale e de pòdere leare e propònnere a pustis provedimentos chi torraiant prus a contu pro su cumpartu, cunforma a sas resursas a disponimentu e in sos tretos de sas cumpetèntzias meas”.

Sa Giunta de reghente at aprovadu unu disinnu de lege chi in tempos imbenientes lnd’at a arresonare in Consìgiu e chi previdit s’impitu de unas cantas mesuras istraordinàrias a sustennu de sas impresas isulanas, intre de custos interventos mirados in favore de su setore de su cìnema e de s’audiovisivu. “Non dia a faeddare, duncas, de retardu, leadu in cunsideru chi sos bandos pro sa promotzione de sa cultura cinematogràfica, sende sa discipilina in vigèntzia in matèria ant semper tentu tempìsticas diferentes cunforma a sos Avisos se s’Ispetàculu de persone o de sos Festival literàrios”, marcat Biancareddu.

“Asseguro chi cherimus illestrire totu sas proceduras pro assegurare a sos Organismos sa licuididade chi serbit pro parare fronte a sa purrata de emergèntzia: cara a custu chirru si sunt moende sos ufìtzios de su Servìtziu cumpetente, chi finas a oe ant fatu sa licuidatzione de su prus de sos saldos chi tocant pro s’annualidade 2019.  In s’interis chèrgio pònnere una regulamentatzione istraordinària a tales de abrandare sas cunsighèntzias malas chi sas mesuras asrintòrgias sunt faghende a sos Festival cinematogràficos, ponende in contu in sa deliberatzione annuale de programmatzione resursas subra s’isvilupu de su cìnema in Sardigna, unoas cantas curretziones a sas diretivas de atuatzione chi ant a dèpere fraigare una casta de lìneas ghia pro sos bandos imbenientes.

Acollende sos inditos de sas Isole del Cinema si podent previdire antetzipatziones de su contributu intregadu finas a s’80% cun una percentuale in  aumentu cunforma a su 70% prevìdidu in sa Deliberatzione de su 2017. Su contributu, a manera ecetzionale, pro su 2020, s’at a pòdere istrinare finas pro sos istados de adelantamentu de su gastu. N prus s’ant a pòdere ammìtere sps gastos giai fatos pro sa programmatzione e sa promotzione de eventos chi, pro neghe de s’emergèntzia, non si sunt pòdidos fàghere. S’ant a permìtere finas genias noas de gastos chi benint dae sa reprogrammatzione de sos progetos, cun s’impreu de maneras noas de gosamentu e de acumprida che, pro esempru, piataformas digitales e trastes chi disfrutant sas tecnologias noas.