CASTEDDU. In s’istajone 2020 s’ant a pèrdere 9 milliones e 698 mìgia presèntzias: su 70% in mancu de istràngios e su 59% de italianos. Su faturadu de sos albergos l’ant a segare de 800 milliones de èuros, s’at a pèrdere su 67% de sos postos istajonales (prus de 50 mìgia traballadores in mancu), totu su sistema turìsticu at a pèrdere prus de 2,5 milliardos de èuros. Est sa fotografia de cussu chi at a acuntèssere a s’ìsula nostra finas si s’istajone  diat dèpere inghitzare a prenu su 1 de trìulas. S’anàlisi de su chi at a capitare l’ant presentada sos tres assòtzios de Categoria regionales: Federalberghi, Confindustria e Confcommercio chi rapresentant su prus de su sistema econòmicu produtivu de s’ìsula e duncas de su Pil.

Pro custu sos tres assòtzios ant fatu comintzare una campagna de regorta de firmas indiritzada a su presidente Christian Solinas pro ascurtare sa chènscia issoro. “Non b’at prus tempus, su 15 de maju pro totu su sistema est s’ùrtima data a disponimentu pro tènnere cosa segura e respostoas de comente, cando e si sa Sardigna at a pòdere èssere in sa lista destinatziones turìsticas de s’istajone 2020.

“Totu custu non si podet aguantare. Sas istruturas alberghieras sunt prontas, sos aeroportos sunt prontos, sos ristorantes sunt prontos e gasi sos traballadores, totu su sistema est prontu”. Pro custu sas rechestas sunt: a connoschere luego sa manera pro torrare a abèrrere in seguresa, sos protocollos sanitàrios e sos processos dae s’arribbu de sos turistas a cando si nche moent e sas règulas de sighire si si podent presentare formas de contàgiu.