CASTEDDU. "Aprofitemus de sa suspensione de s’atividade didàtica pro inghitzare sa restruturatzione de su patrimòniu edilìtziu iscolàsticu e universitàriu”. Est sa proposta fata dae su Cna Sardegna a sa Regione sarda. Si chistionat, prus a minudu, de belle 2mìgia fràigos pro in totu 2,6 milliones de metros cuadros chi tenent bisòngiu de un’acontzu istruturale e energèticu.

“Si moat dae sos fràigos iscolàsticos – declarant Francesco Porcu e Antonello Mascia, unu segretàriu regionale de sa Cna Sardegna e su segundu presidente de Cna Costruzioni -  pro inghitzare unu pianu mannu de investimentos pùblicos, una casta de New Deal sardu chi abèrgiat a unu ciclu edilìtziu ecosostenìbile dae su ghetu de su reimpreu, de sa recualificatzione, de su megioru energèticu, de su reprìstinu e de sas bonìficas ambientales, de sa manuntentzione e de pònnere in seguresa su territòriu; est custa sa crae pro torrare a fàghere comentzare s’economia de sa Sardigna in tempos de corona virus”.

In sa mesa unu pianu de recualificatzione e megioru de su patrimòniu iscolàsticu universitàriu, “de fàghere a pitzu de presupostos noos – si leghet – cun una regia regionale forte chi cunsentat de acumprire sos cantieris, oe firmos comente mustrat su report nostru”. In cale manera?

a)Una òpera manna de semplificatzione de sas proceduras e de allestrida de sos tempos de acumprida de sos progetos presentados a sa regione dae comunes e provìntzias moende dae su pianu 2018/2020, chi balent 300 milliones de èuros (de 414 progetos petzi 3 sunt cantieràbiles);

b)Integrende sos investimentos in s’edilìtzia iscolàstica cun àteros 200 milliones de èuros, pro mèdiu de s’impreu de una parte de fundos europeos 2014/2021 chi sunt galu de impinnare”.