CASTEDDU. In Sardigna bi sunt 272 comunes (de 377) in ue non b’at registradu perunu contàgiu de coronavirus. Tres dies a como fiant 277. Sunt 78 intamas sos territòrios municipales in ue est essida a campu a su mancu una positividade ma prus pagu de 4. Positividade arta meda l’ant agatada in Tàtari, su comune ebbia cun prus de 200 positividades (subra pagu prus de 900 in totu). In Casteddu tzitade sos contagiados sunt 43: s’ùrtima sinnalatzione est de domìniga.

Sa Regione at frunidu finas s’isparghinada de su contàgiu a pitzu de sas oto provìntzias betzas, chi torrant a sos distretos de sas leadas sociosanitàrias. Sa situatzione mègius est in Ogiastra, ue si registrat su 0,1% de positividade de totu s’ìsula. Sighit su Sulcis cun su 0,9% de totu s’ìsula. In Campidanu de Mesu est a su 6,3%, su de Aristanis a su 4,6%, in su de Nùgoro a su 7,2%, in Gaddura a su 7,5 mentras su 55,7% de sas positividades comente est craru est in sa leada de Tàtari.