CASTEDDU. Nche bàrigat su 46% sa percentuale de sas impresas sardas de totu sos setores serradas pro decretu, belle 52 mìgia atividades chi ant lassadu in domo, prus de 126 mìgia intre adetos e dipendentes. Intre de sos setores corfidos dae su blocu b’at s’artesania cun prus de 26 mìgia impresas (belle su 70% de su setore) e belle 70 mìgia traballadores. Ma a custu nùmeru ufitziale tocat de annànghere cussas chi sunt faghende s’atividade in parte o ismenguada, cussas chi ant seberadu de serrare ce non podent buscare sistemas de amparu individuale o de mantènnere su “distantziamentu sotziale”, cussas sena rechesta de produtu o servìtziu e cussas chi depent peleare pro buscare matèrias primas, semitraballados o recàmbios. Totu serradas finas sas 22.378 impresas ediles, de custas su 58,1% artesanas (13.011 realidades), chi impiegant prus de 40 mìgia adetos.

Una “Bomba sotziale” chi pertocat a su mancu a 100 mìgia famìlias sardas e prus de 300 mìgia persones isbetende sustennu istatale o de sos entes bilaterales de sas atividades produtivas. Sos contos sunt de s’Ufìtziu Istùdios de Confartigianatos Imprese Sardegna, chi at analizadu sa situatzione cunforma a sos còighes ATECO insertados in sos Decretos e in sos agiornamentos chi sunt arribados dae su 11 de martzu e posca.

Intre sas impresas de artesania serradas sos setores prus corfidos sunt: s’edilìtzia (francu sos installadores de impiantos chi podent traballare) cun belle 13 mìgia aziendas serradas, sighidas dae su cumpartu de su beneistare 2.900, dae sa metalmecànica cun 2.000, sa moda 300, linna/arredu cun 1.500 e s’artìsticu illarghiadu cun 7.000 atividades serradas.

A sos primos postos de sas cosas chi si bolent fàghere bi sunt: a andare a su ristorante, a biagiare, a afestare e a fàghere shopping. E duncas pro custu proponimus unas cantas solutziones: sustennu a sa capatzidade de gastu (comente sa segada de su cùneu fiscale), detratziones a su 100% pro restruturatziones e manutentziones e àteros bonus chi potzant dare impèllida a sas còmporas o a sa gosadura de servìtzios.