CASTEDDU. "Deo custu estiu finas tenende sa patente in sardigna non dia pònnere pee. No est chi a cada sardu chi benit a Milano li pedimus sa certificatzione de immunidade dae sa cardanca chi apestant sas berbeghes, e puru cussas faghent mòrrere”. Lu narat una (non) turista, chi at iscritu in una pàgina de unu b&b chi ammustraiat sas novas pro una istajone turìstica chi s’isbetat peleosa. S’istrutura de retzida est “La casa di nonna Peppina”, in Santuidu, in su Sàrrabus.

Unu si diat inchietare pro cussas allegas essidas in tempos istrambecos pro beghe de su coronavirus. Intamas sa mere de s’atividade, Wilma Svedese,  cunfirmat sas intragnas bonas de ospitalidade e acasagiamentu.

E li respondet befulana. “ Alessandra istimada, medas amigos e òspites de Milano e Lombardia mancu si lu diant bisare de pensare cussu chi at naradu vostè a pitzu de su pòpulu sardu (e custu mi consolat). Amus semper retzidu òspites diferentes dae cada logu, de cada bisura, religione, etnia…No amus mai discriminadu a nemos pro dae ue arribaiat ca credimus in sa balia de sa diferèntzia. Amus a sighire a trabballare cun su risitu in cara e sa professionalidade chi nos distinghet, mancari gosi”. Non sunt mancados finas sos saludos nòdidos.